فن لعب اداره راس المال الجزء الثانى

بسم الله الرحمن الرحيم
و الصلاه و السلام على اشرف الخلق سيدنا محمد صلى الله عليه و سلم

اليوم هنتكلم على الجزء الثانى من اداره راس المال و بخاصه استراتيجيات التداول و استراتيجيات راس المال

لما بنقول استراتيجيه التداول اكيد الناس هتكون فاهمه ان المقصود هو الاستراتيجيه المستخدمه فى التداول
للعلم فى استراتيجيات كتيره جدا ماشاء الله عليها و افكار جميله لكن المشكله اللى بتواجه المتاجر ايه بقى ؟

فى البدايه يبدأ المتاجر انه يدور على استراتيجيه سهله و فى نفس الوقت مكسبها كبير نسبيا زي ما قلنا فى المثال قبل كده مثلا 70% ل 30% او اقل او اكثر
و بعدها يشتغل بيها فتره من الزمن لحد ما يلاقيها بدأت تقلل نسبه الارباح و بالتالى هو يبدأ يدور على استراتيجيه تانيه و هكذا

او مثلا يلاقى استراتيجيه و يشتغل بيها و بعد كده يلاقيها بقت فاشله او او او و برده هيدور على استراتيجيه تانيه او اسلوب متاجره تاني

طيب ليه المتاجر مفكرش انه يدور على العيب فى الاستراتيجيه ده و يعدله ؟
ليه مفكرش يشوف فين السبب اللى خلى الاستراتيجيه ده مش ناجحه بعد ما كانت ناجحه ؟

و هنا بيبدأ كم من المشاكل فى راس المال لا حصر لها طب ازاى؟

حضرتك كمتاجر شايف ان شغلك بالاستراتيجيه القديمه تمام و شغال بيها مفيش اى مشكله و معتمد على نقط دخول و خروج ثابته و كله تمام
لما الاستراتيجيه يبدأ الاستوب فيها يبقى اكتر من البروفيت هتبدأ تدور على استراتيجيه جديده بس و انت فى بالك انك عايز استراتيجيه تعوض خسايرك سابقا ده اولا
و ثانيا تديلك ربح كمان

يعني لو بمثالنا ان الاستراتيجيه المستخدمه كانت 70% ربح و 30% خساره
حضرتك اشتغلت وقت بيها اى كان هو و بعدها لقيت ان ال30 % بس هما اللى بيتحققوا و الباقى لا يعني مفيش مكسب

ساعتها هتدور على استراتيجيه جديده تعوضلك ال 30% الخساره و كمان تديلك ال70% مكسب جديد يعني انت بتدور على استراتيجيه بتدي 100% مكسب و ده مستحيل
كتير من الناس مش بيحسبها بنسب لكن بيحسبها انه عايز يعوض خسايره و يكسب اكتر بس فى الواقع ده اللى بيحصل

عموما هتبدأ تدور على استراتيجيه بالمنظر ده و مش هتلاقى فتكون مضطر انك كل شويه عمال تجرب و تجرب عشان توصل لاستراتيجيه 100% مكسب ساعتها ايه اللى هيحصل فى حسابك ؟

اولا مش هتعمل باك تست صح لانك مستعجل
ثانيا من كتر تجاربك فى السوق و الاستراتيجيات هتلاقى انك مع اول خساره فى الاستراتيجيه هتسيبها و تهرب منها و تدور على غيرها و ده مش سليم
ثالثا لو جربت فى اليوم استراتيجيه و خسرت منها 10% او 5% من حسابك يبقى معنى كده انك فى اقل من شهر هتكون مصفر حسابك تماما

طيب الحل ايه و الخطوات الصح ايه عشان ماوصلش للمرحله ده ؟
فى حلين حل صح و حل اصح او ادق

الحل الصح انى لما احب اغير طريقه شغلى او الاستراتيجيه اللى انا شغال بيها اقفل حسابي الحقيقي تماما و امسك الاستراتيجيات الجديده و اجربها على الديمو الاول
لمده لا تقل عن شهر او على حسب الاستراتيجيه فى استراتيجيات بتتجرب شهرين و 3 و بعد ما اتقن العمل بيها كويس و اعرف نقاط الضعف و القوه فى كل واحده
اختار و اقارن بينهم لحد ما استقر على واحده منهم عشان لو بدأت العمل بيها و خسرت فى اول صفقه مثلا لا قدر الله يبقى انا متقبل ده و فاهمها و حكمي عليها من خبره مش من مجرد صفقه

طب و الحل الاصح او الادق ؟

الحل ده انى اكون اصلا فاهم السوق و فاهم الحركه و افهم ان الموضوع مش موضوع استراتيجيه و خلاص و نقط دخول و خروج
لا الموضوع موضوع سيناريو و حركه و مسرحيه بتتكرر باسلوب و نمط و استايل
يعني ايه الكلام ده او بالادق ايه اللى انا بقوله ده ؟

ده سر من اسرار المجال بتاعنا و عشان نفهمه نركز شويه فى الجزء الجاى

دلوقتى انا عندى السوق معتمد على ايه ؟ او الشارت معتمد على ايه ؟
معتمد على سعر و وقت صح و الاتنين متغييرين السعر و الوقت
طيب نقيسها كده بحياتنا عامه و نشوف الكلام ايه
حضرتك السوق ده عامل زي الانسان بيصحى الصبح بيكون لسه مش فايق و حركته على السرير فقط و بطيئه ( فتره اسيا ) و بعدها بيفوق شويه و يبدأ يومه بالنشاط و الشغل ( فتره اوروبا )
بعد كده بيرجع من شغله يريح شويه و يقوم شويه ( فتره امريكا ) بعد كده بيبدأ يتحضر للنوم تاني و الهدوء ( فتره اسيا لليوم الجديد )

طيب ما نفس الانسان ده هو هو اللى بيكون فى الصيف نشيط و بيسافر مصيف ( فتره النشاط الاقتصادي والتحركات من شهر 6-9)
و هو نفسه اللى بيكون نايم و سقعان فى الشتا و تحركاته بسيطه و محسوبه ( فتره الهدوء الاقتصادي من بدايه السنه حتى شهر 3 )
و هو نفسه اللى بيبقى مش عارف يتقل و لا يخفف فى اللبس فى الخريف ( الفتره من شهر 9-12)
و هو نفسه اللى بيبقى نشيط يوم و خملان يوم فى الربيع ( الفتره من 3-6 )

طيب لو حضرتك بقى انسان و عندك مثلا جاكت تقيل هل هتلبسه طول السنه و لا ليه وقته ؟

الاستراتيجيه زي الجاكت و السوق زي الانسان لازم توفق اللبس مع المود السوقى عشان كده تلاقى كتير من المتاجرين بيشتغلوا باسلوب و يسيبوه لانه فى وجهه نظرهم فشل و لما يرجعوا يجربوه تانيه فى وقت ما يلاقوه شغال تمام
يبقى الحل هنا انى اظبط الهدوم على السنه و تحركاتها
يعنى اعدل الاستراتيجيه مع تحركات السوق و ده الحل الادق

مثال بسيط جدا على التحليل الفنى
انا بحب على الشارت جدا الفيبو و الترندات و الدعوم و المقاومات يعني كلاسيكي بحت
لما اجى فى اول السنه و الدنيا لسه بتقول يا هادي و تبدأ تنتعش بارسم الترندات على الفريمات الصغيره فقط لان الحركه عامه بطيئه و عشان السعر يوصل لترند على فريم كبير محتاج دفعه قويه مش هتكون موجوده فى السوق فى الوقت

الحالى
و العكس فى الوقت اللى بيكون فيه الاقتصاد منتعش
لما يكون الدنيا نايمه و هاديه اعتمد فى اهدافى على الاهداف البسيطه و السريعه و العكس فى الوقت المنتعش
الفيبو مثلا لو رسمته على فريم الساعه هيعمل معاك نتايج زي ما ترسمه على فريم الدايلى او الويكلى بس الفرق فى كم النتايج و حجمها
و الفرق برده فى السرعه اللى بتتحدد غالبا بسبب الانتعاش الاقتصادي او الركود
يعني معنى كده ان العيب مش فى الاستراتيجيه لا العيب فى التحركات الفعليه للسوق

وزي ما اتفقنا ان طريقه الشغل مش هى المشكله لكن المشكله القصوى هى تغيير طريقه الشغل من فتره للتانيه هتخلينا نروح للمارجن و احنا مش حاسين و لا واخدين بالنا

و ده اول استراتيجيه من استراتيجيات اداره راس المال اننا نلعب مع راس المال بخطه كويسه و مرنه مع مرونه السوق و انحناءاته
بالعكس فى نظرى كمان ان ده اهم استراتيجيه لراس المال

من كل الكلام ده محتاج نفهم جزء مهم جدا و هو المروونه مع السوق
السوق حركته قويه احنا معاه السوق حركته ضعيفه احنا برده معاه يعني احنا اللى بنكيف الادوات بتاعتنا فى اى استراتيجيه للسوق مش السوق هو اللى هيظبطلنا المؤشرات و الاستراتيجيه

برده هارجع و اقول اى حد مش فاهم اى كلمه من الكلام ده يقولى و نشرح من تاني و باسلوب و امثله تانيه و الله المستعان